Pak orë pas ndarjes nga jeta e legjendës së modës, Karl Lagerfeld është vendosur edhe zëvendësuesja e tij.
Virginie Viard, drejtoresha e stilit të markës “Chanel”, do të jetë pasuesja e Karl-it, i cili ndërroi jetë të martën në Paris, në moshën 85-vjeçare.
Viard ka punuar së bashku me Karl Lagerfeld gati që nga fillimi. Puna e saj me “Chanel” filloi në vitin 1987, kur një mik i familjes i rekomandoi emrin e Viard dizajnuesit për një stazh.
Të dy dizajnuesit kanë qenë të pandashëm që nga ajo kohë. Në intervistën e saj të fundit në numrin e dhjetorit të revistës “ELLE”, Virginie pranoi se urren të jetë në qendër të vëmendjes dhe se i pëlqen që ta befasojë me punën e saj ikonën e modës.
“Ai është shumë i ndjeshëm, bujar – gjë që mund të mos jetë ajo që njerëzit do të mendonin për të”.
Vetë Lagerfeld e ka përshkruar kështu raportin e tyre:
“Ajo është dora ime e djathtë dhe dora ime e majtë. Marrëdhënia jonë është thelbësore”.
Vdekja e Lagerfeld vjen si një lajm i papritur pasi deri më sot nuk ishte raportuar asnjë problem shëndetësor që mund të ketë pasur ai.
Në një intervistë të sinqertë me “Numéro” në prill 2018, Lagerfeld foli për vdekjen, plakjen, madje edhe planet për funeralin e tij.
“Unë kam bërë çdo analizë dhe ata nuk kanë gjetur ndonjë gjë që nuk shkon”, tha ai. “Më thërrisni përsëri pas dhjetë vjetësh dhe do të flasim”.
Pavarësisht se ishte mirë nga shëndeti një vit më parë, Karl Lagerfeld tregoi planet për funeralin e tij. Ai ka qenë kundër që trupi i tij të varroset, dhe ka kërkuar që të digjet dhe hiri i tij të shpërndahet së bashku më atë të së ëmës dhe të maces Choupette.
Lagerfeld qëndronte shumë kohë me macen e tij me qime të bardha, e cila ka edhe një profil të sajin në rrjetet sociale.
Kur u pyet nëse Choupette do të ishte trashëgimtarja e pasurisë së tij, ai u përgjigj: “Mes të tjerëve, po, por mos u shqetësoni, ka mjaft për të gjithë”.
Mendohet se pasuria e Lagerfeld vlente afërsisht 200 miliardë dollarë në kohën e vdekjes së tij.
/Iconstyle.al
