Aida dhe djali i saj Peter kanë ardhur nga Kanadaja për të ndarë një histori në studion e “Ka një mesazh për ty” në “E diela shqiptare” në Tv Kla.
Ata kishin ftuar prindërit Lefter dhe Fatbardha për t’u bërë një lutje e për t’i marrë me vete, ppasi Peter ishte rritur nga gjyshërit.
Aida nga Vlora është larguar para 20 vitesh nga Shqipëria drejt Greqisë, ku ka jetuar me ish-bashkëshortin. Lidhja e tyre me shkuesi nuk zgjati shumë. Ndenjën dy vite e gjysmë atje dhe më pas vendosën të shkonim në Kanada për një jetë më të mirë të cilën e kishin gjetur edhe në Greqi. Në Kanada kishin probleme me dokumentat. Nga stresi i tepërt, Aida humbi fëmijën e parë, ndërsa më pas vjen në jetë Peter.
Ajo tregon se më pas u braktis nga i shoqi, dhe duke qenë se punonte nuk mund ta rriste dot e vetme djalin kështu që e dërgoi në Shqipëri. Aida e vuante shumë mungesën e tij dhe kishte frikë se i biri do ta harronte, ndaj i dërgonte foto kur ishte 18 muajsh.
“Nuk mund ta mendoja të rrisja një fëmijë në lot, sepse ato lot zbrisnin në faqen e tij. Pas disa problemeve ai u largua në Shqipëri dhe unë isha vetëm. Prindërve nuk i tregova për largimin e tij. Aty u detyrova që djalin ta çoja në “babysitter” (dado), sepse nuk ishte e lehtë dhe fillova një punë të dytë. Kishte momente që djalin nuk e shihja për tre ditë. Fillova të bëja tre punë vetëm për Peterin. Më vonë e dërgova në Shqipëri me një të panjohur tek prindërit në Vlorë, sepse nuk e mbaja dot në Kanada. Ai ishte vetëm 18 muajsh. Dërgoja fotografi çdo tre muaj, sepse mendoja se do më harronte fytyrën.
Kur ishte 5 vjeç e gjysëm erdha në Shqipëri, por nuk e mora dot, sepse nuk kisha të gjitha dokumentet që i ati nuk i jepte. Peteri nuk ka marrëdhënie dhe nuk e njeh të atin. Një vit më vonë, në moshën 6 vjeç e gjysëm djali erdhi në Kanada, në Toronto, dhe më rrinte larg, sepse ishte shumë i dhënë pas gjyshes. Ai donte të flinte me gjyshen në një krevat dhe e detyroi atë të vinte në Kanada”.
Aida tregon se e ëma e ka ndihmuar shumë, ajo e ka rritur djalin e saj, kujdesej për të, e dërgonte në shkollë dhe punonte për një ekonomi më të mirë.
Prindërit e saj kanë rritur katër fëmijë, kanë sakrifikuar shumë. I ati ka shkuar disa herë në Kanada, por nuk do të rrijë atje.
Në studion e emisionit “E Diela Shqiptare”, pas mesazhit të dërguar nga gazetari, erdhën dy prindërit e Aidës, zoti Lefter dhe zonja Fatbardha nga qyteti i Vlorës. Zoti Lefter në muajin Dhjetor iu nënshtruar një operacioni në zemër dhe nuk mundi t’i mbante lotët dhe emocionet pasi pa nipin e tij bashkë me vajzën, dhe i kërkoi Ardit Gjebreas që të bashkoheshin pa pritur më gjatë, duke i prishur surprizën dhe fjalimin e gjatë të tyre.
Ardit Gjebrea: Ata duan që ti të shkosh në Kanada.
Lefteri: E pamundur.
Megjithëse Lefteri nuk thyhet kollaj për të marrë vendimin që të jetojë me vajzën dhe nipin në Kanada, jemi të bindur që zemra e tij, njëlloj si e zonjës Fatbardha, është kudo me ta. Për gjyshërit është e vështirë shprehja “larg syve, larg zemrës”.
