Geraldi prej 15 vitesh ishte i varur nga konsumimi i lëndëve narkotike, por prej pak muajsh vendosi që të merrte vendimin më të rëndësishëm të jetës së tij.
Ndërsa i ishte futur kësaj rruge të gabuar që kur ishte 16 vjeç, Geraldi tregoi gjatë emisionit “Dua të të bëj të lumtur” se nuk kishte dëgjuar për shumë vite lutjet e familjes për të hequr dorë prej drogave.
Ai pohoi që ka muaj që nuk konsumon lëndë narkotike, përveç medikamenteve qetësues, ndërsa zgjodhi këtë emision për t’i kërkuar falje nënës së tij Linditës.
“Të solla në këtë program për të të kërkuar ndjesë për çdo problem që të kam shkaktuar. Por arsyeja kryesore është se dua të të premtoj që unë do heq dorë nga droga dhe do të bëhem një njeri më i mirë!”, tha Geraldi.
Nëna e tij pasi tregoi vështirësitë që kishte kaluar me të birin, pranoi në fund faljen e tij.
