Fakulteti i Shkencave Sociale do t’i rikthehet procesit normal mësimor ditën e nesërme.
Televizioni “Klan” raporton se Asambleja e Përgjithshme e Fakultetit të Shkencave Sociale ka vendosur që ditën e enjte, procesi mësimor të rifillojë normalisht.
Që prej fillimit të javës pedagogët e këtij fakulteti kanë qenë në grevë duke bojkotuar procesin mësimor me kërkesën e vetme për rrëzimin e ligjit të Arsimit të Lartë.
Dy ditë më parë, grevës së pedagogëve të Shkencave Sociale iu bashkua edhe lideri i opozitës kosovare e kreu i Lëvizjes Vetëvendosje, Albin Kurti, i cili mbajti edhe një fjalim.
Prezenca e tij u kritikua nga disa deputetë të mazhorancës socialiste. Edhe dekani i këtij fakulteti, Edmond Rapti ka qenë kundër grevës së pedagogëve dhe protestës së studentëve.
Ndërkohë, Fakulteti i Histori-Filologjisë e ka nisur procesin mësimor që prej së hënës dhe tashmë është radha e kolegëve të tyre të Shkencave Sociale.
/Tv Klan
