Nisma “Dhuro një buzëkuq”, një fushatë sensibilizuese kundër dhunës ndaj grave, ndonëse ka vetëm pak ditë që është prezantuar në rrjetet sociale, që tani i ka kapërcyer kufijtë e Shqipërisë.
Në prag të Ditës Ndërkombëtare të Gruas, 8 marsit, kjo nismë ka bërë bashkë gra dhe vajza jo vetëm nga Shqipëria, por edhe nga Kosova, Maqedonia e madje dhe Shtetet e Bashkuara të Amerikës dhe synon të përhapet edhe më tej.
Por në çfarë konsiston fushata sensibilizuese që dalëngadalë po pushton rrjetet sociale?
Hapi i parë për t’u bërë pjesë e nismës “Dhuro një buzëkuq” është të dërgosh të dhënat e tua në faqen në Instagram: emër, mbiemër, adresë dhe numër telefoni. Procesi i regjistrimit do të zgjasë deri në datën 1 mars dhe më tej, secilit prej jush do t’i jepen të dhënat e një tjetër gruaje të cilës do t’i dhuroni buzëkuqin e kuq që është dhe simboli i fushatës, bashkangjitur me një shprehje apo shkrim sipas preferencës suaj.
“Dhuro një buzëkuq” synon të jetë një urë bashkimi për gratë shqiptare brenda dhe jashtë kufijve të vendit që me një dhuratë simbolike e tepër domethënëse si buzëkuqi i kuq, kërkon të ndërgjegjësojë shoqërinë për të drejtat e grave, në një kohë kur ato janë ende larg standartit të dëshiruar.
