Ministrja e Arsimit, Rinisë dhe Sporteve, Besa Shahini, ka treguar se do të bëhen katër ndryshime në Ligjin e Arsimit të Lartë, sot gjatë mbledhjes së Komisionit të Mediave.
Ndryshimet do të nisin me përfaqësimin e studentëve. Pesha e votës së tyre do të rritet nga 10-50%, si dhe përfaqësimi i tyre në senat dhe në bordet e menaxhimit. Me këto ndryshime, studentët siç shprehet ministrja do të kenë mundësi të zgjedhin përmes votës se kush duhet t’i përfaqësojë ato.
“Kemi të bëjmë me një nismë ligjore për ndryshimin e katër neneve të ndryshimit të Ligjit të Arsimit të Lartë. Rritja e përfaqësisisë së studentëve nga 10-50 për qind, por edhe në organet e tjera të zgjedhjeve të dekanëve, por edhe në borde të tjera të menaxhimit. Vendimet në senat duhet të merren nga persona me një ekspertizë shumë të lartë”, tha mes të tjerash ministrja Shahini.
Ministrja theksoi gjithashtu se janë shkarkuar përfaqësuesit e ministrisë që janë nëpër bordet e universiteteve, ku një nga përfaqësuesit do të zgjidhet nga vetë studentët.
“Kemi themeluar te portali i transparencës që të botohen të gjithë vendimet e senatit, buxhetet që edhe studentët e papërfaqësuar të jenë të informuar, cdo tre apo katër muaj informacioni do të azhornohet dhe të gjithë do të ketë të njëjtën qasje, që të dinë se si shpenzohet buxheti për universitetin”, tha ajo.
Shahini premtoi gjithashtu transparencë për fondet dhe shpenzimet në Universitete, të cilat sipas saj do të azhornohen çdo tre muaj.
