Filmi shqiptar “Delegacioni” arriti të triumfonte në Festivalin e Varshavës, pasi rrëmbeu dy çmime. Por sukseset nuk kanë të ndalur për të, pasi tashmë mësohet se ka marrë një tjetër çmim të rëndësishëm në një tjetër festival.
“Delegacioni” arriti të fitonte çmimin e filmit më të mirë me metrazh të gjatë në Festivalin e Filmit të Triestes.
Çmimi “Trieste” iu dorëzua regjisorit Bujar Alimani për filmin që, trajton tentativat ekstreme të sistemit komunist në fund të viteve ‘90. Ky është çmim më i rëndësishëm italian, kushtuar kinemasë së Europës Qendrore dhe Lindore.
“Një film që lëkundet mes farsës dhe tragjedisë, për të rrëfyer një fazë kritike të historisë së Shqipërisë. E shkuara komuniste tenton të rikthehet vazhdimisht në kinematografinë shqiptare”, shkruan shtypi italian si përshkrim të filmit shqiptar.
“Delegacioni” ka rrëmbyer edhe një tjetër trofe, “PAG” që u dorëzua nga juria e të rinjve, me motivacionin:
“Regjia lëvizë si uji, një element shumë simbolik në film, në mjegullat paradokse të historisë politike, i përforcuar në studion e ngjyrave edhe të dritës”.
Ngjarjet në film zhvillohen në tetor të vitit 1990. Regjimi komunist kërkon të mbajë pushtetin, ndërsa në Tiranë vjen një delegacion europian për të parë nga afër mbarëvajtjen e reformave të qeverisë. Leo, i dënuar me 15 vite burg, është bërë jashtëzakonisht i vlefshëm për pushtetin e kohës, sepse delegacioni udhëhiqet nga një shok i shkollës së vjetër të Leos. Ai duhet të bindë delegacionin se çdo gjë është në rregull, por ngjarjet marrin tjetër rrjedhë.
