Familja e një biznesmeni në Durrës kaloi orë tmerri, pasi u grabit nga tre persona të paidentifikuar.
Ngjarja e ndodhur në Shkozet këtë të shtunë ishte menduar mirë nga grabitësit, të cilët pasi lidhën familjarët brenda në shtëpi morën 10 mijë euro dhe u larguan në drejtim të paditur.
Por ngjarja shokuese nuk përfundoi me kaq, pasi grabitësit si garanci për të mos njoftuar policinë morën peng edhe djalin e biznesmenit, të cilin e lanë të lirë disa kilometra më tej.
“Kanë qenë tre persona të armatosur, që i kanë zënë prit tek dera e shtëpisë biznesmenit të fushës së transportit ndërkombëtar. Fillimisht lidhën të zotin e shtëpisë dhe bashkëshorten, ndërsa njëri prej tre grabitësve mbajti nën presion djalin. Në këto momente po merret në pyetje biznesmeni. Ai kishte dalë shëtitje me të birin për një kafe dhe pasi u kthye në shtëpi u përballë me grabitësit”, tregon gazetarja Klodjana Haxhiaj për “Balkanweb”.
