Pas reshjeve të mëdha të dëborës dhe pamundësisë për të vijuar procesin arsimor në mënyrë normale, drejtuesit e arsimit vendosën që shkollat e qarkut të Korçës të mbyllen ditën e nesërme.
Lajmin e bëri të ditur drejtori DAR Korçë Kristaq Grabocka. Sipas tij, ‘Drejtoria Arsimore Rajonale Korçë, nisur nga situata tejet e rënduar nga rreshjet e dëborës, të cilat e bëjnë të pamundur zhvillimin normal të procesit mësimor, vendosi ndërprerjen e tij për nesër dt. 10.01.2018’. Drejtuesit e arsimit nuk janë ende të vendosur se çfarë do të bëjnë një ditë më pas, derisa shtojnë se ‘Për ecurirë do të njoftojmë sërish’.
Reshjet e dëborës kanë rënë me intensitet të lartë dhe trashësia ka arritur rreth 30 centimetra në qarkun e Korçës. Në disa akse rrugore dëbora ka shkaktuar probleme në qarkullim, pasi në zonat malore trashësia ka rritur deri në 50 centimetra, ndërsa Dardha është bllokuar për shkak se gjatë ditës së sotme kanë rënë tre ortekë.
