Në “Hell’s Kitchen” të gjithë e pranojmë që njohëm një anë të egër të Renato Mekollit, që nuk mendonim se e kishte. Shefi i kuzhinës nuk la jo vetëm konkurrent pa trembur, por edhe teleshikuesit, që e ndoqën sezonin e parë të emisionit.
Ndërsa sjellja e tij ishte për t’iu përshtatur formatit dhe profesionit, programi rezultoi ndër më të ndjekurit.
Në intervistat e tij së fundmi Mekolli ka treguar se, “Hell’s Kitchen 2” do të vijë shumë shpejt, por sot na lindën të gjithëve dyshimet se në cilin televizion do të transmetohet.
Shefi i njohur i kuzhinës u fotografua ditën e sotme pranë ambienteve të TV Klan. Në imazhet e publikuara në median “GazetaExpress”, Mekolli shfaqet në parkingun e ambienteve të televizionit, teksa drejtohet për në makinën e tij.
Kaq mjaftoi që të nisnin aludimet se, Renato kishte braktisur “Top Channel” për “TV Klan”-in.
“Iconstyle.al” vendosi që të kontaktonte me shefin e kuzhinës, i cili u shpreh se momentalisht nuk mund të tregonte asgjë më shumë në lidhje me këtë çështje. Megjithatë më tej ka shtuar: “Do të keni shumë të reja. Shef Renato do të jetë aty ku vërtetë shkëlqen ajo që bën dhe mbështetet nga njerëzit e kanalit ku është”.
Pak ditë më parë ai njoftoi se, do të jetë gjithashtu pjesë edhe e një emisioni dedikuar fëmijëve, po në fushën e gastronomisë.
Burimi: Iconstyle.al
