Banori i Astirit që goditi me këpucë kryeministrin Edi Rama, është lënë i lirë nga Gjykata e Tiranës.
Në seancën e sotme gjykata ndryshoi masën e sigurisë për Ilir Katirajn, duke i caktuar “detyrim paraqitje”.
50-vjeçari qëlloi me këpucë ndaj kryeministrin Rama, pasi ky i fundit doli nga spitali ku kishte vizituar efektivët e plagosur nga protesta e banorëve të Unazës së Madhe.
Pas vizitës, në një prononcim për mediat para spitalit, Rama tha se humbja e gishtave të dorës nga efektivja e policisë vendosi vijën e kuqe mes paligjshmërisë dhe mbrojtësve të ligjit.
Prononcimi i tij u ndërpre nga thirrjet e banorëve të Astirit, të cilët njëzëri bërtisnin: Turp! Turp!
Në këtë moment Ilir Katiraj hoqi këpucën dhe e gjuajti në drejtim të kryeministrit.
