Pasi zhvilluan një tryezë diskutimi, studentët vendosën që do ta vazhdojnë protestën përsëri në janar.
Studentët e Shkencave Sociale vendosën që të rinisin përsëri protestat pas pushimeve pasi diskutuan në fakultetin e tyre dhe morën këtë vendim.
Ndërsa studentët e Gjeologjisë kanë vendosur që nesër të zhvillojnë protestën përfundimtare para Parlamentit për këtë vit.
Ndërsa sot, studentët vendosën të bllokojnë për disa minuta rrugët. Studentët e Shkencave Sociale dhe ata të Natyrës kanë marshuar drejt Kryeministrisë por do të bllokojnë për disa minuta kryqëzimin te “9 Katëshet”.
Kujtojmë se studentët e Fakultetit të Ekonomisë kanë vendosur që të mos paguajnë asnjë tarifë deri në plotësim të 8 kërkesave të tyre dhe gjithashtu kanë shtyrë sezonin e provimeve.
“Mbi takimin e zhvilluar mes Dekanatit dhe Studentëve të Fakultetit të Ekonomisë.
Ditën e Hënë, datë 17 Dhjetor, ora 16:00, në Godinën “Liria”, Salla A101, u zhvillua takimi i njoftuar i Studentëve dhe Dekanatit të Fakultetit të Ekonomisë.
Gjatë takimit, që zgjati 4 orë dhe u transmetua drejtpërdrejt në disa media dhe rrjete sociale, morën pjesë qindra studentë dhe u diskutuan probleme të Arsimit të Lartë, Universitetit të Tiranës dhe Fakultetit të Ekonomisë.
Falenderojmë të gjithë studentët për diskutimet e kryera dhe problematikat e ngritura.
Dekanati i FE, gjatë mbledhjes së ditës së sotme, diskutoi dhe vendosi në lidhje me organizimin dhe ndarjen e punës për përshpejtimin e zgjidhjes dhe adresimit të problematikave për të cilat u ra dakord me studentët.”- shkruhet në njoftim të faqes së Fakultetit të Ekonomisë.
