Prova të reja që rëndojnë mbi shqiptarin 19-vjeçar për vrasjen e studentes greke në Rhodes, Greqi, janë gjetur së fundi.
Në shufrën e hekurit me të cilën u godit viktima është gjendur ADN-ja e shqiptarit Aleksandër Luka, duke bërë që të shtohen akoma më shumë dyshimet se 19-vjeçari shqiptar vrau studenten greke.
Megjithatë shqiptari mohon akuzat:
“Nuk e bëra unë, e bëri ai tjetri”, dëgjohet të shprehet i riu duke akuzuar shokun e tij grek, Manolis Koukouras, i cili është gjithashtu bashkëpunëtor në ngjarje.
Mediat greke bëjnë me dije se i riu ndodhet në burgun e Grevenas pas sulmit të dhunshëm në burgun e Avlonas. Mjekët e spitalit Evangjelismos nuk konfirmuan përdhunim të 19-vjeçarit.
Pamjet e rënda janë publikuar nga mediat greke pak ditë më parë ku shihet se si 19-vjeçari dhunohet nga të burgosurit e tjerë.
Manolis Koukouras dhe i riu shqiptar, akuzohen për përdhunimin dhe vrasjen e studentes 21-vjeçare, të cilën pasi e dhunuan, e hodhën në det me këmbë të lidhura.
