Studentët kanë vendosur t’i shkojnë deri në fund fjalës së tyre. Në ditën e tetë të protestës, ata ngulin këmbë se kërkojnë vetëm plotësimin e 8 kërkesave nga kryeministri Edi Rama dhe për këtë nuk do të ketë dialog.
Të rinjtë kanë protestuar përgjatë gjithë ditës të ndarë në dy grupe, një pjesë qëndron përpara Ministrisë së Arsimit, ndërsa pjesa tjetër ngre zërin përpara Kryeministrisë. Duket se ata kanë vendosur të mos kthehen në shtëpi, por të protestojnë përgjatë gjithë natës.
Për të luftuar sadopak me të ftohtin dhe temperaturat e ulëta në Tiranë, ata kanë ndezur një zjarr përpara Kryeministrisë për t’u ngrohur.
Sakaq, disa nga qytetarët e Tiranës janë sensibilizuar me të rinjtë, duke i dhënë batanije dhe ushqime.
Studentët kanë planifikuar që ditën e nesërme të protestojë përpara Kuvendit në orën 10 të mëngjesit.
