Studentët vijojnë protestën edhe ditën e sotme, ku edhe përse janë ndarë në dy grupe, disa ngrejnë zërin në Ministrinë e Arsimit dhe disa përpara Kryeministrisë, ata ritheksojnë se kanë vetëm një qëllim, plotësimin e tetë pikave nga Edi Rama. Të rinjtë refuzojnë të dialogojnë me kryeministrin shqiptar, madje e cilësojnë edhe bashkëbisedimin e tij në “Top Show” si një monolog ku morën pjesë militantët e partisë së tij!
Sakaq, ka ardhur edhe reagimi i kryeministrit Edi Rama përmes një postimi në rrjetet sociale, ku e cilëson ditën e tetë të protestës si një ditë e humbur! Sërish, Rama i tregon të rinjve se i pret për dialog.
“Një tjetër ditë e humbur me arsyen e Mosarsyes: Kam kërkesa po s’dua të flas për to, prandaj m’i plotëso! Kështu funksionon në Klinikën e Doktorreshë Monës, në Gjumin e Lul Artistit, në Megafonin e Profesor Qorrit, po jo në mësimet e demokracisë e të prindërve tuaj. Unë ju pres” – shkruan Edi Rama.
Të rinjtë nuk dorëzohen sërish! Në intervistat e dhëna për “News24”, ato janë shprehur se do të qëndojnë në shesh derisa kërkesat të përmbushen. Ndërsa, kanë paralajmëruar se do të protestojnë ditën e nesërme përpara Parlamentit.
