Ashtu siç e kishin paralajmëruar edhe disa ditë më parë, studentët dhe gjimnazistët nga e gjithë Shqipëri kanë bojkotuar mësimin dhe kanë pushtuar rrugët duke bërtitur të drejtat e tyre. Në Tiranë, Elbasan, Korçë, Vlorë, Shkodër, Gjirokastër dhe Sarandë, studentë kanë nisur protestën mëngjesin e së martës, ku kërkojnë plotësimin e kërkesave të tyre në lidhje me kushtet e Arsimit të Lartë.
Mëngjesin e së martës, protestuesit kanë paralajmëruar kryeministrin Edi Rama se nuk do të ketë asnjë negociatë përgjatë gjithë ditës së sotme, si dhe theksuan se ka afat deri në orën 16.00 për të përmbushur të gjitha pikat e vendosura prej tyre. Studentët u shprehën se protesta do të përshkallëzohet nëse kryeministri refuzon të miratojë kërkesat e tyre. Madje, ata kanë nisur të bllokojnë të gjithë nyjet lidhëse të kryeqytetit për të bllokuar kalimin e makinave.
Një pjesë e tyre ndodhet përpara godinës së Ministrisë së Arsimit, ndërsa pjesa tjetër u mblodh tek Universiteti Politeknik dhe ka nisur parakalimin në bulevard përpara kryeministrisë, duke kënduar Himnin Kombëtar. Studentët e Gjeologji Minierave janë me kaska të verdha, ndërsa studentët e Universitetit të Arteve kanë marrë veglat muzikore.
Sarandë:
Korçë:
Vlorë:
Elbasan:
Gjirokastër:
Shkodër:
8 kërkesat e studentëve:
1. Rritja e buxhetit në 5% e GDB me qëllim mundësimin e përgjysmimit të tarifës së studimit për çdo nivel studimi, përmirësim e mësimdhënies dhe infrastrukturës (universitete dhe konvikte).
2.Transparence me buxhetin nga ministria e Arsimit dhe IAL-ve, publikimi të gjitha shpenzimeve online
3.Rritja nga 10% në 50% e peshës totale të votës së studentëve për të zgjedhur kandidatët për dekanë, rektorë dhe cdo fakultet të ketë një përfaqësues të studentëve në senatin akademik.
4. Rishikimi i titujve akademikë dhe verifikimi i plagjiaturave të doktoraturave dhe teksteve mësimore.
5.Mbështetur në nenin 99 mbi Këshillat Studentore, ligji i arsimit të lartë, pika 2 kërkojmë që bordi i administrimit të IAL-eve të ketë numër të barabartë votash si nga MAS dhe IAL-t si edhe të shtohet një përfaqësues në këtë bord nga studentët.
6.Pajisja e të gjithë studentëve me kartën e studentit brenda vitit akademik 2018-19
7.Ndërtimi i bibliotekave me starndarde europiane dhe me libër universitar online, falas për studentët në gjuhën shqipe.
8.Vlerësimi i performancës në mësimdhënie dhe kërkim shkencor i pedagogut, publikimi i tij online dhe regjistrimi i leksioneve.
