Ngjarja e bujshme që ndodhi në Tiranë në zonën e ish-bllokut më 4 tetor ku mbeti një i vrarë e dy të plagosur përfshiu edhe këngëtaren e njohur shqiptare Elvana Gjata.
I fejuari i saj Ervin Mata i cili është i shpallur në kërkim ishte një nga protagonistët e ngjarjes, që në fillim u dyshua se ndodhi për shkak të një ngacmimi që i’u bë këngëtares.
Ndërkohë që të gjithë të pranishmit në ngjarjen e rëndë u kërkuan për dëshmi në polici, Elvana Gjata u shpall në kërkim pasi u largua nga Shqipëria menjëherë pas ngjarjes së ndodhur.
Pas kalimit të afatit për t’u paraqitur për dëshmi , “ABC News” ka zbuluar se këngëtarja është rikthyer në Shqipëri para një jave përmes aeroportit të Rinasit. Sipas burimeve pranë prokurorisë ajo ka zgjedhur avionin e një linje të orëve të vona të natës.
Nga ana tjetër është mësuar se Elvana ka dhënë të gjitha shpjegimet e nevojshme për takimin dhe biseden me të fejuarin e saj, Ervin Mata para ngjarjes.
Ndërkohë që nuk dihet dëshmia e saj e plotë është mësuar se ajo është pyetur edhe vendndodhjen e Matës dhe nëse kishte dijeni për konfliktet e tij.
Sot gjithashtu nga “Report Tv” u mësua se këngëtarja kishte dërguar në prokurori një letër ku tregonte se ndodhej jashtë për arsye shëndetësore.
