Të gjithë prisnim që Flori Mumajesi të prezantonte këngën e tij në “Kënga Magjike” të dielën që kaloi. Thuhej se do të rikthehej në 20-vjetorin e festivalit me një baladë që do të godiste zemrat e të gjithëve dhe në një farë mënyre, këtë bëri këtë të martë.
Këngëtari ka publikuar këngën më të fundit “Ja ke bo vetes” në bashkëpunim me Brunon, që na duhet ta pranojmë se ka një mesazh të fortë që i drejtohet një femre dhe që djeg shumë.
Gjithë këto kohë Flori na ka lënë në pritje, për të mësuar më shumë nga jeta e tij në Prishtinë dhe femra që i ka rrëmbyer zemrën dhe ja, ai vjen me një këngë me tekst të shkruar vetë, që i kushtohet një femre që e ka tradhtuar, (me pak fjalë kujt t’i djegë le ta mbajë):
“T’i kisha dhënë më të mirat e jetës, ma ke bërë mua, ja ke bërë vetes”, është refreni i kënduar nga Bruno, ndërsa vijon: “Dhe kur me mu fleje, fshehje zemër fshehje”.
Kënga është publikuar sot në orën 15:00 dhe Flori nuk ka bërë asnjë reagim deri më tani. Bruno ndërkohë, ka folur në Instagram, ku shprehet se kënga ishte gati me videoklip, por u publikua në versionin audo, pasi kishte bërë xhiron e internetit dhe ishte dëgjuar nga shumë persona, ende pa dalë në YouTube.
“Detyrohem ta publikoj sot pasi këto ditë kënga ka bërë xhiron e rrjeteve sociale! Ishte planifikuar të publikohej me videoklip por pasi shumë njerëz tashmë e kanë dëgjuar dhe po e kërkojnë, sot në orën 15:00 do ta gjeni në YouTube”, shkruan ai.
Nuk e dimë nëse kjo është kënga e bujshme me të cilët Flori do të shënonte rikthimin në “Këngën Magjike”, por nga gjasat mendojmë se surprizat nuk mbyllen me kaq!
