Pasditen e së enjtes, një përleshje e armatosur ndodhi mes policisë greke dhe një grupi shqiptarësh në zonën e Pogonit në Janinë. Sipas mediave greke, pasi vunë re policinë, ata kanë qëlluar me armë ndaj efektivëve të policisë, e për pasojë një shqiptar humbi jetën, identiteti i së cilit nuk është bërë ende i ditur. Nga ana tjetër, edhe një polic ka mbetur i plagosur gjatë aksionit ndaj grupit që trafikonte lëndë narkotike.
Sakaq, policia greke ka nisur aksionin për të arrestuar edhe 4-5 personat e tjerë, që dyshohet të jenë përfshirë në ngjarje. Forca të shumta policore kanë blinduar dy anët e kufirit të gjelbër mes Shqipërisë dhe Greqisë pas vrasjes së shqiptarit, si dhe vendin ku ndodhi ngjarja. Burimet për televizionin “Klan” janë shprehur se policia shqiptare është vënë në dijeni për këtë ngjarje nga homologët grekë.
Ngjarja
Një grup shqiptarësh kanë përshkruar rreth 23 kilometra përmes kufirit të gjelbër nga Shqipëria drejt Greqisë, duke transportuar një sasi kanabisi, bëjnë të ditur mediat greke. Ata u vune re nga policia greke që patrullon kufirin jeshil pranë fshatit Vissani dhe u bëri thirrje për të ndaluar. Policia greke njofton se grupi i trafikantëve, që dyshohet të kenë qenë rreth 5-6 vetë, hapën zjarr me armë. Të shtënave iu kundërpërgjigj policia greke, e cila vrau një shqiptar. I plagosur lehtë me plagë në dorë mbeti edhe një efektiv grek.
Ndërkohë, pjesa tjetër e grupit të bashkëpunëtorëve të shqiptarit të vrarë arritën të largoheshin. Dyshohet se ata mund të kenë hyrë sërish në territorin e Shqipërisë nga kufiri jeshil. Për këtë arsye po kryhen kontrolle masive nga policitë e dy vendeve. Identiteti i shqiptarit të vrarë nuk dihet ende. Në vendin ku ndodhi përplasja e armatosur, policia greke thotë se gjeti dhe sekuestroi 10 çanta me rreth 100 kg kanabis dhe dy kallashnikovë.
Burimi: KLAN
