Në mars të vitit 2017, këngëtarja Irma Libohova humbi bashkëshortin e saj, Besnikun, i cili u nda nga jeta si pasojë e një sëmundje të rëndë. E ftuar në emisionin “Rudina”, Irma u shpreh se nuk do të derdhë më lot sepse ajo është vetëm, por jo e vetmuar. Premtim të cilin nuk arriti ta mbajë deri në fund të emisionit.
“Gjithmonë bashkë… Derisa unë të shkoj atje, do të jetë bashkë me mua”, – u shpreh mes emocionesh këngëtarja shqiptare.
Ndër të tjera, Irma rrëfeu se vetëm tre ditë pasi i shoqi u largua nga kjo botë, erdhi në jetë mbesa e saj, vajza e djalit të cilën e pagëzuan me emrin Lule.
“Të gjithë më kishin thënë që është një ndjenjë shumë e mirë, është kështu, është ashtu, por kur e provon vetë, është tjetër gjë, është e mrekullueshme, e papërshkrueshme. E quajtëm Lule. E donin emër shqiptar, përfaqëson prejardhjen dhe identitetin tonë. Ishte harruar këtë emër dhe vendosëm ta risjellim sërish.” – tha këngëtarja Irma Libohova.
Mes lotësh, ajo tregoi se bashkëshorti i saj i ndjerë mezi e kishte pritur atë moment, por që për fat të keq nuk e përjetoi dot.
“Ai nuk e arriti dot. E priste me shumë dëshirë, siç çdo prind. Por se pati atë fat, por i lutem Zotit që t’ia japë lajmin atje lart. Por jeta vazhdon, shkoi një jetë erdhi një tjetër. Na zëvendësoi atë dhimbjen.” – tha mes lotësh Irma Libohova.
