Paratë që paguhen nga studentët si tarifë për të vijuar universitetin shkojnë për shpenzime luksi. Një fakt i tillë u zbuluarnga një studim i realizuar nga organizata studentore ‘Qëndresa Qytetare’, për tre universitete publike në Tiranë, atë “Aleksandër Moisiu” në Durrës dhe “Aleksandër Xhuvani” në Elbasan.
Sipas studimit rezulton se, të ardhurat që përfitohen nuk shpenzohen për të siguruar mjetet e nevojshme për studentët në fakultet, por për kënaqësi vetjake të pedagogëve.
Mësohet se mbi 1 miliard lekë të vjetra ka shpenzuar Universiteti i Durrësit për rikonstruksione ndërtesash dhe pajisje zyrash, ndërsa Universiteti i Elbasanit ka blerë një automjet me vlerë 76 milionë lekë.
Po ashtu marramendëse janë edhe shpenzimet për ruajtjen dhe sigurimin e ndërtesave.
Nga monitorimi rezulton se Universiteti i Tiranës shpenzon 21,304,490 lekë, Universiteti i Durrësi 10,780,030 lekë dhe Universiteti i Elbasanit 28,001,297 lekë. Sipas monitorimit shërbimi i ofruar në këto fakultete nuk i justifikon shifrat që zënë një shumë të konsiderueshme, të cilat burojnë nga tarifat e studentëve apo edhe nga buxheti i shtetit.
Më tej në studim thuhet se Universiteti i Tiranës nuk ka kryer asnjë transaksion për nënkategorinë Bursa Studimi për këtë vit akademik dhe ka shpenzuar 45,577,368 lekë, për vendime gjyqësore apo largime të drejtpërdrejta nga puna.
Burimi: Newsbomb
