Paraditen e djeshme, Konstantinos Kacifa hapi zjarr ndaj efektivëve të policisë shqiptare me breshëri për më shumë se 30 minuta kur u rrethua nga RENEA dhe terrorizoi qytetin e Gjirokastrës për 5 orë.
35-vjeçari ishte pjesë e batalionit të Forcave Speciale të Forcës Tokësore, ndërsa pas lokalizimit nga policia në Bularat nuk iu bind urdhrit për të hedhur armën, por qëlloi në drejtim të uniformave blu dhe në këtë moment RENEA e ekzekutoi duke e qëlluar në kokë dhe në gjoks.
Pas vrasjes atij iu sekuestruan një kallashnikov, dy karikatorë, një çantë me fishekë luftarakë, 31 gëzhoja, ndërsa në banesë uniforma ushtarake. Konstantinos Kacifa, minoritar me origjinë nga Bularati kishte hyrë në Shqipëri në datë 2 tetor, ndërsa në ditët e fundit kishte vendosur disa flamuj grekë në fshat.
Ish-kreu i organizatës politike Omonia Leonidas Papas, që përfaqëson minoritetin grek në Shqipëri tha për “Protothema.gr” se Kacifas u nervozua pasi nuk e gjeti flamurin grek që ai i ngrinte çdo vit në të njëjtin vend.
Ai kishte paralajmëruar në Facebook, sulmin ndaj Policisë pasi bënte thirrje kundër shqiptarëve (lexo këtu). “Report Tv” thotë se fjalët e fundit të grekut, para se të vritej nga RENEA kanë qenë: “Rroftë Greqia, rroftë helenizmi”.
Burimi: Shqiptarja
