Shtatzënia është një nga periudhat më të bukura që kalon para se të bëhesh nënë dhe të marrësh në krahë fëmijën tënd.
Ndaj shumë femra zgjedhin ta përjetësojnë këtë moment përmes fotove profesionale dhe videove të realizuara në muajt e fundit të pritjes së ëmbël.
Këto foto bëhen edhe më interesante kur femrat shtatzënë janë emra të njohur të ekranit.
Jo më larg se dy ditë më parë “iconstyle.al” solli një listë të gjatë me të famshme që kishin realizuar foto profesionale gjatë shtatzënisë (lexo këtu), ndërsa sot do të sjellim ato të famshme që e kanë mbajtur për vete këtë moment.
Ja femrat e njohura të ekranit që zgjodhën të mos publikonin asnjë fotografi gjatë shtatzënisë.
Valbona Selimllari
Në vitet 2012-2013 të gjithë flisnin nëpër zë se ish-miss Shqipëria, Valbona Selimllari ishte bërë nënë, por ajo zgjodhi ta mbante private këtë gjë deri në vitin 2014. Deri në këtë vit, jo vetëm që nuk pamë asnjë foto shtatzënë të Valbonës, por dhe lajmi për shtatzëninë dhe lindjen e tre fëmijëve, u fsheh me shumë kujdes nga ajo. Kulmi arriti kur revista “Story” publikoi në 2013-n lajmin që Valbona Selimllari ishte në pritje të fëmijës së saj të tretë dhe kishte shkuar në Çeki, aty ku banon e motra, për ta lindur atë. Mediat shkruanin se të nesërmen e hedhjes në treg të revistës, Valbona mblodhi të gjitha revistat nga pikat e shitjes, që lajmi të mos shkonte te lexuesi.
Soni Malaj
Për Soni Malajn, shtatzënia në vitin 2011 ka qenë periudha më e bukur e jetës së saj, vetëm se ne nuk kemi qenë aspak dëshmitarë. Deri në muajin e katërt, këngëtarja ka treguar se barku i saj nuk është dukur aspak për shkak të linjave të saj të rregullta dhe palestrës. Soni madje nuk ka qenë në Shqipëri gjatë shtatzënisë, por në Spanjë, në vendlindjen e Mirkos, babait të vajzës. Edhe pse larg ajo zgjodhi të mos publikojë asnjë foto sesi dukej gjatë atyre muajve dhe në vijim pas lindjes së Anna-s.
Alketa Vejsiu
Alketa Vejsu është gjithashtu një ndër të famshmet shqiptare më fanatike sa i përket jetës private. Jo vetëm që nuk kemi një foto të saj shtatzënë, por nuk ekziston asnjë foto e saj e veshur nuse. Gjatë martesës Alketa ka dashur të censurojë çdo pamje të bashkëshortit të saj ndërkohë që nuk ka pranuar as të pozojë e vetme me fustan të bardhë. Nicole dhe Lionel janë dy fëmijët e moderatores, fytyrat e të cilëve vështirë se i kemi parë ndonjëherë përballë dhe kjo ka qenë zgjedhja e moderatores.
Miriam Cani
Dy vitet e fundit kemi pasur shansit të shohim dhe të adhurojmë fytyrën e engjëllore të Ameli. Por kur mami Miriam Cani ishte shtatzënë me vogëlushen, nuk pati asnjë moment që ta shihnim me barkun e rrumbullakosur. Periudha e shtatzënisë ka qenë private për çiftin e këngëtarëve, Alban Skënderaj dhe Miriam Cani. Pas lindjes së vajzës, ky qëndrim ndryshoi dhe nuk kishte sesi të ndodhte ndryshe. Prindërit e shfaqin shpesh herë dashurinë e madhe që ndjejnë për vogëlushen dhe duan ta ndajnë atë edhe me ndjekësit në Instagram.
Loredana
Lajmi për shtatzëninë e saj u mësua këtë vit nga mediat pasi Loredana dhe Mozzik zgjodhën ta mbanin të fshehtë. Por edhe pse sot çifti bën postime të ëmbla për foshnjën që po presin, ende nuk kemi foto që të dëshmojnë periudhën e ëmbël të pritjes. Loredana është reperja më e re shqiptare dhe stili i saj me veshjet e gjëra dhe oversize, e ka ndihmuar në këtë drejtim.
Elita Rudi
Moderatorja Elita Rudi renditet gjithashtu në listën e të famshmeve që janë treguar të rezervuara për shtatzëninë. Deri më tani nuk kemi asnjë foto të Elitës me barkun e rrumbullakosur, të paktën që ta ketë publikuar ajo vetë. Të vetmet raste kur kemi pasur mundësinë të shohim barkun e saj kanë qenë fotot pa mendje ose ato të dasmës, të cilat me vështirësi tregonin shtatzëninë e Elitës. Duke qenë se ka edhe pak kohë deri në lindjen e foshnjës, ende kemi shpresa për disa foto të bukura!
