Ok, e pranoj! Asgjë nuk më shijon më shumë sesa të ulem me miqtë e mi në një cep të barit në fund të ditës, e t’u rrëfej sesa e vështirë është të jetosh me mijëra kilometra larg atij që do. Po nejse, kjo është një temë tjetër! Mjafton gota ime e koktejlit (që asnjëherë nuk është e njëjta) dhe hallet e ditës më shuhen si me magji. Falë Zotit, në Tiranë baret janë shtuar si kërpudhat, ndaj nëse di ku të trokasësh gjen ngrohtësinë e duhur!
Më kishin thënë që në jetë duhet të takosh patjetër një barmen dhe se kisha kuptuar asnjëherë përse. Derisa një ditë, një person me një veshje interesante, na afrohet në tavolinë dhe na prezanton me koktejlin e dashurisë. I frymëzuar nga miqtë e mi, kokë e këmbë të dashuruar, ai kishte krijuar një koktej, që e mbante në dorë si të ishte një vepër arti. E do s’do që mbetëm të shashtisur jo vetëm nga shija e llahtarshme që kishte koktejli, por edhe se u pagëzua në atë moment si koktej personal i pëllumbave të dashuruar që kishim në tavolinë, duke u gdhendur me inicialet dhe numrin e tyre të fatit.
E pra, kështu e njoha unë Mirian Dautin, një nga barmenët më të talentuar që jeton (edhe për ca kohë) në Tiranë!
Për Mirin, nuk është aspak e lehtë të krijosh një koktej. Ai e krahason profesionin e tij, me atë të piktorit, që duhet patjetër të jesh i frymëzuar, pasi nuk është diçka që ndodh përditë. Madje, krijimet e tij më të mira, janë ato që kanë buruar nga inati e sipër duke u kthyer në vepra arti që mbajnë firmën e barmenit “Remmy Style”.
“Inatin që kisha përbrenda e kam nxjerrë duke krijuar. Në një ditë normale është e pamundur të krijosh, të buron nga brenda. Në momentin që prek banakun, fillojnë të shfaqen të gjitha faqet, reklamat , imazhet, filmat që ke parë në minutat e fundit dhe nis të kompozosh. Dhe kulmi është realizimi! Nuk është se i mendoj më parë, kur jam në banak për një minutë i përziej të gjitha përbërësit dhe krijoj një koktej. Duke parë e duke provuar, krijoj emrin e më pas dhe historinë që e lidh me të.”
Nuk kish si të ndodhte ndryshe! Koktejli më i veçantë që ai ka krijuar është ai që personifikon stilin e tij, “Remmy Style”.
“Koktejli im i veçantë është ai që kam krijuar për herë të parë dhe quhet “Remmy Style”. Është stili im! Është një “playground” që kam krijuar. Kur bëhesh bartender, duhet të krijosh një personazh tëndin! Pamja, stili është ajo që të bën të veçantë dhe ndryshe! Ti je figura e barit dhe kjo është e rëndësishme.”
Por një barmen i mirë nuk është vetëm ai që përzien përbërësit dhe krijon koktejlin perfekt! Barmeni është shpirti i festës, komediani, psikologu, terapisti, rrëfimtari! Ai që dëgjon të gjithë, që nuk lodhet duke dhënë këshilla dhe sigurohet që çdokush të largohet me një buzëqeshje në fytyrë.
“Një barmen i mirë i bën njerëzit të buzëqeshë, fillon të krijosh koifidencë dhe ti bëhesh një mik dhe një shok shumë i mirë me të. Dhe herë pas herë psikolog shumë i mirë! Shumë klientë të mi më rrëfejnë se nuk janë të lumtur në punën që bëjnë përshembull në bankë dhe i sugjeron të zgjedhin atë që dashurojnë.”
Historia e Mirit me këtë profesion, nuk ishte aspak rastësi, pasi atëherë vetëm 18 vjeç, u dashurua në largësi me shaker-in, zhurma e së cilit u kthye në himnin e jetës së tij. Etja për dije mbi këtë profesion i dha shumë siguri, ndaj edhe sot di çdo sekret që mbart një shishe alkooli dhe njeh çdo “martesë” të tyre. Por si ishte të mësoje mbi koktejlin në vitin 2006, vite kur bota e internetit ishte shumë e largët për shqiptarët?
“Isha vetëm 18 vjeç kur nisa për herë të parë punë si kamarier në një bar. Ndërkohë që shihja ato djemtë në banak që krijonin, pasi ishte viti 2006 dhe koktejet nuk ishin bërë trend akoma. Përmes filmit “Ulkonjat e Shëmtuara dhe “Cocteils and Drinks” me Tom Cruise, kisha arritur të krijoj një ide se çfarë është barmen. Me një siguri shumë të madhe, lash punën si kamarier pas një muaji dhe nisa të mësoj më shumë për pijet. Pasi tek të gjitha kuponat tatimor, kisha zbardhur recetat e koktejeve që ishin hit në atë kohë si “Mojito” apo edhe “Long Island”. Ka qënë shumë e vështirë për të mësuar pasi nuk kishte internet në Tiranë, kanë qënë vetëm qendrat e internetit. Ndaj një miku ynë udhëtonte në Maqedoni dhe blinte librat që na mësonin më shumë.”
Ashtu siç çdo barmen në botë, as Miri nuk i shpëton dot pyetjes se “cili është profesioni i tij i të vërtetë”. Sepse, hey, barmen është thjesht një pasion, shkolla është shkollë!
“Kur përballem me klientë dentist, habiten nga njohuritë e mia. Dhe kur i them se kam mbaruar përfundimet për laborant dentar, shtangen përse nuk e vijova më tej. Ndërkohë që ka shumë të tjerë, që më përgëzojnë që kam zgjedhur të bëjë atë që dua.”
Miri ka më shumë se 13 vite në këtë profesion, ndaj nuk duhen më shumë se dy kuba akulli dhe një gotë, e ai të rikthen buzëqeshjen si me magji! Mirëpo ky passion, vjen së bashku me sekrete të errëta, pasi errësira e natës atë përcjell.
“Sekret i errët! Hmm, janë dhimbjet, vuajtjet, sakrificat! Nga ana tjetër, droga dhe alkooli. Ti je i rrethuar të gjithë kohën nga droga dhe nuk do që të tundohesh, kjo është errësira. Unë tani jam “clean”, kam hequr dorë, por është shumë e vështirë. Rrethohesh nga jeta e natës dhe kjo është errësira e saj.”
Prej disa ditësh, barmeni me origjinë nga Librazhdi është bërë për herë të parë baba i një djali, i cili e ka të përcaktuar fatin e tij. “Remmy Style” nuk do të përmbyllet vetëm me karrierën e Mirit, por do të jetë një trashëgimi që do të vijojë për breza të tërë.
“Po të pyesësh bashkëshorten time se çfarëdo të bëhet djali, do ta japë përgjigjen direkt. Do të ndjekë hapat e mia! Djali do të bëhet bartender! Unë dua që “Remmy Style” të jetë një trashëgimi ndër breza! Jam inspiruar nga një familje kasapesh në Firence dhe kanë një dyqan mishi shumë të famshëm. Ata kanë gjashtë breza kasapësh, po ne përse mos t’i kemi gjashtë breza bartenders! Së shpejti shpërngulem në USA, ndaj kjo do të vijojë edhe atje”
Dhe për çdo të ri/e që u frymëzua nga dashuria dhe pasioni i Mirian Dautajt për këtë profesion, ai ka vetëm një këshillë: “Shijoje zanatin, pastaj dashurohu!”
Burimi: Iconstyle.al
