Ajo ishte vetëm 3 vjeçe kur emigroi nga Gjilani në Belgjikë së bashku me familjen.
Dhe sot Deniza Miftari ka arritur të fitojë zgjedhjet lokale në Belgjikë, duke u bërë asambleiste e zgjedhur e komunës së Roseslares.
Shqiptarja ka falënderuar të atin e ndjerë në një postim në Facebook, ku shkruan se ai e ka mbështetur mbi gjithçka edhe kur rrezikoi të humbiste. Ajo ia dedikon të atit të gjithë suksesin dhe i premton edhe më shumë:
“Dua ta shfrytëzoj këtë rast për të falenderuar motivin tim për pjesëmarrje ne këto zgjedhje komunale: dashurinë e jetës time, babin. Dëshira jote më e madhe ishte ta përjetoje edhe këtë kapitull timin por jeta vendosi ndryshe. Ti më sfidove në gjithçka qe bëra dhe më mbështete kur rrezikoja të humbja gjithçka. Do e jepja tërë botën për t’i ndarë këto momente me ty sepse e gjithë kjo është padyshim meritë e jotja. Një odë për dashurinë që e kam për ty.
Babi, edhe pse më mungove gjatë fushatës dhe gjatë fitores, mbrëmë e di që ishe me mua sepse ne asnjë moment nuk u ndjeva e vetme. U kry, babush. Tani mund t’i tregosh të gjithëve atje lart që “qiki vogël’” është zgjedhë asambleistja më e re e Komunës së Roeselares. E di se do ishe krenar për mua por dije se unë jam edhe më krenare për ty.
Faleminderit për dashurinë tënde dhe për besimin e pafund. Ti je frymëmarrja ime dhe gjithmonë do jesh arsyeja që do e vazhdoj jetën me kokën lart. Ky është vetëm fillimi. Të premtoj.
Të dua. Të dua o jetë”, shkruan Deniza.
/Tema
