Babai i reperit Stresi, Sali Lushaj dhe Avdyl Gjokmakaj kanë paditur në Gjykatën e Tiranës kreun e grupit të PS-së, Taulant Balla.
Padia vjen pas akuzave të këtij të fundit në drejtim të tyre, pas publikimit nga PD të videopërgjimit të Fredi Alizotit. Pak kohë më parë Balla e cilësoi Lushajn, si “pjesë e bandës së Berishës”.
Në një prononcim për mediat, Lushaj iu referua deklaratave të Ballës në “Opinion” me 11 tetor, kur tha se deputeti socialist me deklaratat e pavërteta ka cenuar imazhin e tyre.
“Ne nuk jemi banda e Berishës. Unë bashkë me Gjokmakaj jemi pishtarë të demokracisë. Kam derdhur gjak për këtë demokraci, vëllain e kam dëshmor të demokracisë. Më gjatë nuk kam çfarë t’i them, takohemi në gjykatë”.
Shuma monetare që ata kërkojnë si dëmshpërblim është 20 milionë lekë të vjetër:
“Si fillim kërkojmë 20 milionë lekë të vjetra. Kemi bërë gjithë pagesat në gjykatë. Bashkë me Avdyl Gjomakaj, të dy jemi përmendur me datë 11 në Opinion. Zoti Balla të vijë në gjykatë”.
