Masakra që ndodhi në Mat katër ditë më parë i mori jetën tre punonjësve të bashkisë, pasi autori 51-vjeçar Kujtim Koxha, qëlloi me breshëri automatiku drejt tyre.
Në një intervistë për gazetën “Panorama”, bashkëshortja e autorit, Vjollca Koxha, mohoi që i shoqi të ketë qenë person i dhunshëm dhe problematik në fshat. Sipas saj, e gjithë kjo ngjarje e rëndë ka ndodhur për shkak se viktimat (punonjësit e ndërmarrjes së mirëmbajtjes së rrugëve) e kanë qëlluar Kujtimin me shishet e birrës.
“Unë nuk kam qenë aty dhe nuk di se çfarë ka ndodhur. Por kam dëgjuar nga banorët se ata (viktimat) e kanë gjuajtur me shishen e birrës… Ata e kanë dhunuar të parët, ndaj ka reaguar në këtë mënyrë. Se dy duar për një kokë janë”, shprehet Vjollca Koxha.
Ajo u pyet lidhur me marrëdhënien mes saj dhe autorit si burrë e grua, për të cilën mohoi thashethemet e banorëve të zonës se Kujtim Koxha ishte i dhunshëm.
“Kemi 30 vite me njëri- tjetrin dhe nuk kemi pasur asnjë problem. S’më ka dhunuar asnjëherë”, tha bashkëshortja e autorit të krimit.
Lidhur me ngjarjen e rëndë Vjollca u shpreh:
“Nuk po them se ka bërë mirë që i ka vrarë, por ata e kanë ngacmuar dhe ai ka reaguar. Ai është burri im, pavarësisht se çfarë ka bërë. E thashë se ne kemi 30 vjet bashkë dhe unë do t’i qëndroj pranë. Ka bërë gabim të madh, por unë nuk e braktis”.
Burimi: Panorama
