Një ngjarje e rëndë u shënua dje në Novi Sad të Serbisë, ku dy të rinj nga Kosova u rrahën brutalisht, vetëm sepse folën shqip.
Njëri prej tyre, Çlirim Maloku, 19 vjeç nga Hasi i Prizrenit, është në gjendje të rëndë shëndetësore.
I lënduari tjetër G.B., raportohet se ka pësuar lëndime më të lehta trupore. Ky i fundit ka folur pas sulmit që i ka ndodhur në qytetin serb.
Ai ka treguar për “Blicin” serb momentin e sulmit dhe arsyen përse u sulmuan:
“Kemi qenë duke shkuar në shtëpi. Kam parë një taksi në stacion dhe i kam thënë atij në shqip që të nxitojë. Pastaj, dy persona kanë ardhur dhe kanë filluar të na sulmojnë. Më pas kanë ardhur edhe dy të tjerë”, ka thënë B.G., i cili nga mediat serbe thuhet se flet serbisht dhe jeton në Novi Sad.
Kryeministri i Kosovës, Ramush Haradinaj, ka reaguar pas rrahjes brutale ndaj dy të rinjve shqiptarë në Novi Sad.
Përmes një posti në rrjetin social “Facebook”, kreu i qeverisë së Kosovës shkruan se lëvizja e lirë në shtetin e Serbisë nuk është e garantuar.
Sipas tij, çdo veprim apo akt dhune, është një shenjë e cila tregon se ky shtet është larg vlerave evropiane. Gjithashtu Haradinaj krahas urimit për shërim të shpejtë të dy të rinjve, i bëri thirrje Serbisë që ky rast të zbardhet me urgjencë.
