Kryebashkiaku i Tiranës, Erion Veliaj është bërë baba për herë të parë këtë të shtunë. Bashkëshortja e tij Ajola Xoxa, solli sot në jetë djalin e tyre në maternitetin “Koço Gliozheni” në Tiranë.
Burime për “Lapsi.al” thonë se, fëmija ka pasur disa komplikacione të vogla, por është në gjendje të mirë shëndetësore. Vogëlushi, emri i të cilit do të zbulohet nesër, ka lindur me një peshë 3 kilogramë e gjysmë.
“Për emrin e djalit do të vendosë Ajola dhe me shumë kënaqësi ja lashë këtë përgjegjësi. Sigurisht që konsultohem, por kur e shoh se sa e ndjeshme është, mendoj se është më mirë të zgjedhë ajo”, ka thënë Veliaj më herët në një intervistë.
Çifti vendosi që ta mbante të fshehtë shtatzëninë e Ajolës për disa muaj, derisa në qershor të këtij viti Erion Veliaj dhe bashkëshortja e tij treguan zyrtarisht se do të bëheshin prindër.
“Tre rrahje zemrash”, shkroi Ajola në përshkrimin e fotos ku pavarësisht se kishte një buqetë me lule para barkut, ai ishte mëse i dukshëm.
Vetëm pak minuta më vonë edhe kryebashkiaku Erion Veliaj bëri një postim në Instagram, ku uroi 1 Qershorin në mënyrën më të bukur.
“Gëzuar 1 Qershorin dhe nga ne të tre! Ju duam shumë të gjithëve”, shkroi Veliaj.
Erioni dhe bashkëshortja e tij Ajola e kurorëzuan dashurinë e tyre në martesë më 6 shtator të vitit 2014, megjithëse historia e tyre e dashurisë i ka rrënjët më herët, 16 vjet më parë. Ardhja në jetë e fëmijës së tyre të parë do të kompletojë familjen e tyre të vogël.
