Nëse ju duhet vetëm 3 veshje për të qenë “in” këtë sezon vjeshte mos kërkoni më shumë. Një fjalë e urtë popullore thotë “pak dhe saktë”, kështu që mjaftojnë 3 gjëra për t’u ndjerë sikur ia ke arritur qëllimit për të shkëlqyer këtë sezon.
“Iconstyle.al” ju vjen në ndihmë me një rubrikë të veçantë me këshilla që blogeret më të njohura shqiptare do të japin për lexuesit tanë. Vajzat e famshme të Instagramit do të na tregojnë trendet e vjeshtës duke sugjeruar 3 aksesorët apo veshjet “must” dhe si mund t’i kombinojmë ato.
Në rubrikën e kësaj jave do të sjellim këshillat e blogeres shqiptare, Alba Hodo, e cila tregoi për ne 3 trendet e saj të preferuar për stinën e vjeshtës dhe si t’i kombinoni që të merrni komplimente pa fund.
1.Fustani sipër kyçit me print gjarpri
Nëse ka një trend që po e shohim gjithandej, nga pasarelat te Instagrami i fashionsitave shqiptare dhe të huaja, ai është fustani me print të lëkurës së gjarprit. Është trendi numër një që zbriti nga pasarelat e Javës së Modës në Milano, Paris dhe u përqafua shumë shpejt nga street style.
2.Çdo aksesor/veshje në print leopardi
Një tjetër print që ka hyrë fuqishëm në modë është ai i lëkurës së leopardit. Nga aksesorët si çanta apo këpucët, e deri të fustanet dhe xhaketat, ky print është perfekt për këtë periudhë. Edhe nëse thjesht nuk jeni tipi që mund të visheni me print leopardi nga koka te këmbët, një aksesor ose një këmishë mjafton për të përqafuar këtë trend të ri.
3.Xhaketat me kuadrate
Kuadratet janë gjithashtu një dizajn i preferuar për këtë stinë, ndaj dhe Alba Hodo e këshillon atë në xhaketat që vijnë pak të gjata. Këto xhaketa mund të kombinohen me xhinse, funde apo dhe pantallona në të njëjtin dizajn.
