Prej ditësh ylli i futbollit Cristiano Ronaldo është përfshirë në një skandal seksual që po merr përmasa të mëdha.
Bëhet fjalë për disa akuza në lidhje me një modele amerikane, e cila pretendon se në 2009-n Ronaldo e ka përdhunuar. Futbollisti ka hedhur poshtë të gjitha akuzat, ndërkohë që ndaj tij është hapur një çështje gjyqësore në Las Vegas.
Pak ditë më parë u bënë publike fotot ku Ronaldo shihej me ish-modelen, Kathryn Mayorga duke flirtuar në club.
Ajo u takua me futbollistin më 12 qershor, 2009 në një klub nate në Las Vegas. Ronaldo ishte atje me pushime me kunatin e tij dhe kushëririn. Ishte vera kur ylli do të transferohej nga Manchester United tek Real Madrid për një shumë rekord prej 94 milionë eurosh.
Kathryn Mayorga, 25 vjeç në atë kohë, ishte një modele në fillimet e veta dhe rrinte me femrat e tjera të reja, të bukura, për të tërhequr klientë.
Atë të premte qershori, modelja qëlloi të kalonte në seksionin VIP të një klubi nate që i përkiste Palms Casino Resort. Video tregon Mayorga-n që qëndron pranë Ronaldos dhe kërcejnë të përqafuar.
Festa vazhdoi në orët e hershme të mëngjesit në një apartament të Ronaldos në afërsi të Hotel Palms, ku Kathryn thotë se u përdhunua nga futbollisti.
