Në banesën ku ka jetuar Xhisiela Maloku, ndodhet vetëm gjyshi i saj, Taf Maloku! Jashtë shtëpisë, nuk gjendet asnjë patrullë policie, pasi 25-vjeçarja ka refuzuar mbrojtjen nga Prokuroria. Për televizionin “Klan”, Taf Maloku tregon se ndodhej në Itali për arsye shëndetësore dhe vetëm tani është njohur me historinë e mbesës së tij.
“Kam qenë në Itali se isha verbuar nga sytë dhe shkova bëra një operacion. Kam ardhur dhe e kam takuar dhe ç’kam pasur ndonjë lek ua kam çuar, por këtë muhabete se kam ditur. Unë tani kam ardhë nga Italia”. – tha Taf Maloku.
Gjyshi i Xhisielës kërkon nga politika të qëndrojë larg kësaj çështje, pasi është një ngatërresë mes dy të rinjsh. Ai shpreson se te rinjtë do të pajtohen sepse sipas tij, nuk është çështje që zgjidhet me burg.
“Politikanët mos të bëjnë grindje njëri me tjetrin. Ndodhi ajo që ndodhi. Unë e falenderoj, as se shaj Bashën as Sali Berishën. Kanë marrë vesh për një qëllim dhe kanë thënë që është jetime. Mirëpo tani të rinjtë nuk e di se ça bëjnë. Ishalla bashkohen ta marri se s’është punë burgu. Burgu s’është asnjë gjë se s’ka vrarë njeri. As ai s’ka vrarë njeri as goca ime s’ka vrarë njeri. Janë ngatërruar, se janë duke harruar të mëdhenjtë”. –përfundoi gjyshi i 25-vjeçares.
Xhisiela Maloku denoncoi për dhunë ish-të dashurin e saj Rrexhep Rraja, që do të qëndrojë në burg për akuzën e përndjekjes. Ndërsa mbrëmjen e djeshme, 25-vjeçarja pranoi se ka bërë dëshmi të rremë dhe se mbi të nuk është ushtruar dhunë dhe kallëzimet i ka bërë për shkaqe xhelozie.
Burimi: Tv Klan
