Endrit Vejsiu, vëllai i moderatores së njohur Alketa Vejsiu, u arrestua pasi në automjetin e tij të dielën, u gjetën katër mina me telekomandë dhe një sasi lënde narkotike që ndodheshin në gomën rezervë në bagazh.
Ndërkohë që ditën e sotme “RevistaWho.com” ka publikuar një intervistë të moderatores Alketa Vejsiu, që besohet se është realizuar përpara ngjarjeve që kanë tronditur familjen e saj.
Dhe për ironi të fatit, Alketa Vejsiu flet pikërisht për faktin sesi ka ndihmuar nënën dhe të vëllain, duke iu blerë një shtëpi kur ishte vetëm 19 vjeç dhe rrëfen se familja për të është shumë e rëndësishme.
“Familja ka qenë gjithmonë gjithçka për mua. Kam bërë të pamundurën që nënës dhe babait mos t’i mungojë asgjë. Mamit dhe vëllait i bleva shtëpinë me fitimet e para në moshën 19 vjeç. Dhe Zoti më shpërbleu duke më dhënë familjen që kisha ëndërruar; dy fëmijë që janë shpërblimi më i bukur i një dashurie të madhe! Familja është gjithçka për mua!” – është shprehur Alketa Vejsiu.
Moderatorja tregoi se është përpjekur gjithmonë ta mbajë familjen e saj larg kamerave dhe profesionit të saj.
