Xhiseila Maloku pranoi mbrëmjen e djeshme se ka bërë dëshmi të rremë në polici dhe mohoi dhunën, kërcënimet me jetë, rrahjet dhe djegien me cigare nga Rexhep Rrahja. 25-vjeçarja rrëfeu mbrëmjen e djeshme në dy intervista televizive se ka bërë gënjyer në polici si pasojë e xhelozisë.
Por a ndryshojnë rrjedhën e hetimit intervistat e saj televizive ku mohon gjithçka?
Burime nga prokuroria e Krujës të pyetura nga Ora News, thanë se deklarimet e dhëna nga Xhisiela Maloku, nuk janë provat kryesore dhe të vetme në dosjen penale ndaj djalit të deputetit Rrahman Rraja. Dhe për këtë arsye, ndryshimi i deklarimeve nga Xhisiela Maloku nuk ka asnjë ndikim në hetimin e prokurorisë së Krujes ndaj shtetasit Rexhep Rraja për akuzën e përndjekjes ndaj 25-vjeçares.
Xhiseila Maloku është pyetur gjashtë herë nga data 21 korrik e deri më sot dhe sipas organit të akuzës, dëshmitë e saj janë të ndryshme.
“Dëshmitë e shtetases Xhisiela Maloku kanë shërbyer vetëm si pikënisje për fillimin e hetimeve, por procedimi penal ka avancuar më tej me kqyrjen e aparateve telefonike, kamerave të hotelit, administrimin e aktit të ekspertimit mjekolgjor, përgjimin ambiental në ambientet e policisë dhe një sërë provash të tjera që faktojnë akuzën e ngritur për përndjekje”, thanë burimet e prokurorisë.
Ndërkohë që ndaj Xhisiela Malokut nuk do të nisin hetimet për dëshmi të rremë. Kjo pasi sipas prokurorisë, legjislacioni i njeh asaj pozitën proceduriale të të dëmtuarës ku parashikohet edhe mundësia që ajo ta ndryshojë ose ta mohojë krejtësisht dëshminë e dhënë në fazën e hetimit.
Juristët thonë se e vetmja dëshmi e vlefshme e Xhisiela Malokut, do të konsiderohej ajo që do të merrej në prokurori, në prani të avokatit dhe psikologut dhe të paktën 6 muaj pasi e dëmtuara dhe familja e saj të jenë marrë në mbrojtje.
Burimi: Ora News
