Drejtuesit e shoqatës së transportit urban qytetas kanë vendosur që edhe fëmijët të paguajnë biletën e udhëtimit me autobuz, me të njëjtin çmim sa edhe një i rritur. Ata shprehen se deri më tani kanë toleruar që edhe fëmijët 6 vjeç e sipër të mos paguanin biletën e autobuzit, por kjo do të marrë fund tani.
“Shoqata e Transportit Urban nuk ka ndonjë ligj që përcakton që fëmijët mbi 6 vjeç të udhëtojnë falas. Thjesht kur ky shërbim u privatizua ne e toleruam tek fëmijët”, sqaron Kujtim Harshova, kryetar i shoqatës.
Sipas Harshovës, për shkak të trafikut, autobuzët ecin me shpejtësi të ngadaltë, çka bën që të harxhojnë më shumë karburant.
Nga ana tjetër, ata i kërkojnë qeverisë të rimbursojë nëse do që fëmijët mbi 6 vjeç të udhëtojnë falas edhe pse janë skeptikë në këtë pikë pasi thonë se nuk janë rimbursuar as për invalidët, e as për studentët që udhëtojnë falas.
Përllogaritet që janë 160 mijë invalidë dhe 20 mijë studentë të cilët të pajisur me kartën përkatëse nuk paguajnë biletë udhëtimi sipas tyre. Bileta për fëmijët duket se vjen si një presion për qeverinë, e cila duhet t’i subvencionojë për të gjithë udhëtarët që nuk paguajnë.
Burimi: Top Channel
