Shkolla e mesme “Katundi i Ri” në Bradashesh të Elbasanit është dhënë me qira.
Godina është ndërtuar në vitin 2013 me një investim të qeverisë shqiptare që kap vlerën 1.6 milionë lekë. Ajo ishte planifikuar si shkollë e mesme,por nuk i ka hapur asnjëherë dyert.
Gazetarët e “Fiks Fare” shkuan tek kjo shkollë, por e kishin të pamundur të xhironin brenda godinës pasi rrethimi i saj ishte e mbyllur. Në këto kushte, gazetarët iu drejtuan Bashkisë Elbasan për të marrë një përgjigje mbi arsyen e moshapjes së shkollës.
Ky institucion në përgjigjen e tij me e-mail thotë se këshilli bashkiak ka vendosur që këtë godinë ta japë me qira, pa ia ndryshuar destinacionin, ndërkohë oferta që bashkia publikon për dhënien me qira është 75 lekë metri katror. Sipas kësaj shkrese të Bashkisë Elbasan, arsyeja kryesore e moshapjes së kësaj shkolle ishte mungesa e numrit të nxënësve.
Gjithashtu, në shkresë thuhet se kjo ndodh pasi pozicioni i shkollës është jo i favorshëm dhe nxënësit e kësaj njësie e kanë më të lehtë të shkollohen në qytet. Kështu, sipas bashkisë, për të mos lënë godinën të amortizohet, është menduar që ajo të jepet me qira, me kushtin që të mos ndryshohet destinacioni i funksionit primar, pra që të mbetet sërish shkollë.
/Top Channel
