Një ngjarje e rëndë është shënuar në qytetin e Beratit, ku babai i një fëmije 12-vjeçar i cili vuan nga autizmi, ka akuzuar qendrën që kujdesej për të birin se është ushtruar dhunë ndaj tij.
Në një lidhje telefonike me “Fax News”, babai i 12-vjeçarit, Fortunato Boçi ka rrëfyer dhunën e ushtruar ndaj të birit si dhe faktet tronditëse sesi fëmija është lënë tre ditë pa ushqim në qendrën “Jam si ju” e cila ndodhet në qytetin e Beratit.
“Në fillim u gëzuam që gjetëm një vend për ta sistemuar. Djali është 12 vjeç dhe e kam regjistruar me datën 1 qershor. Nuk vazhdoi gjatë dhe pas tre ditësh ai kishte disa goditje, aty kuptova se djali po dhunohej. Javën e dytë lajmërojmë zonjën Mirela Bohuri e cila mblodhi stafin e saj dhe dhe kontaktuam që ky problem mos të ndodhë më. Ndërkohë që të nesërmen në mëngjes djali ishte çarë në sy. Ishte dhunuar brenda 10 orësh.”-ka deklaruar i ati i të miturit.
“Lajmëruam sërish drejtoreshën. Na premtuan që kjo histori e dhunës nuk do të ndodh më dhe përsëri vazhdoi kjo histori ku djali ishte i dhunuar. Prapë më jepnin shpresa se djali do të ishte mirë. Kjo dhunë vazhdonte vazhdimisht.
Nuk ndryshonte skema e këtij problemi. I them gruas të marrim djalin se ne na zuri si prind por nuk mund të pranojmë që të dhunohet dhe të lihet pa bukë. Kujdestarët nuk duan t’ia dinë fare. Është një tmerr i vërtetë brenda në atë qendër.”-ka vijuar më tej ai.
“Në datën 4 shtator kam marrë djalin. Djali kishte 3 ditë pa ngrënë. Ne na thonin që në atë qendër është një fëmijë i braktisur 18 vjeç dhe ai godiste fëmijët e tjerë dhe kujdestarët nuk ishin në gjendje që ta përballonin fuqinë e tij. 18-vjeçari qendronte me të tjerët.
Ai më thonin ta dhunon natën djalin dhe kujdestarët më thonin se nuk kemi se çfarë t’i bëjmë. Janë 22 punëtorë që marrin rrogën dhe janë 26 persona në atë qendër.
Ka shumë fëmijë që janë dhunuar. Kjo qendër varet nga Ministria dhe janë nga rrethet e ndryshme të Shqipërisë. Ato fëmijë rrihen goditën dhe askush nuk e merr vesh. Aty nuk merr njëri përgjegjësi. Fëmijën e kam në shtëpi sepse mori raport dhe e kam në shtëpi djalin. Trembet natën nga torturat që ka pësuar në atë qendër. Kjo çështje duhet të shkojë në prokurori kam 10 ditë sot që nuk më ka thirrur njeri. Unë paguaj 200 mijë lëkë për ushqimin e djalit. Unë i çoj ushqim nga shtëpia dhe nuk ia japin.”-është shprehur Fortunato Boçi duke shtuar më tej se nuk janë marrë masa as për sekuestrimine kamerave të sigurisë, pavarësisht kërkesës së tij.
“Po kam kërkuar që ta çoj në një qendër tjetër. Bashkia me ka marrë inat dhe më ndalon që ta dërgoj atje, pasi bëra denoncimin. Tërhiq denocimin me thonë, mos e bëj publik që të çojmë djalin në qendër.
Më vjen keq për ato persona. Jam kryetar për personat me aftësi të kufizuar në Berat. Drejtoresha të ndiqet penalisht dhe të sekuestrohet kamerat dhe të shpëtojnë fëmijë e tjerë.”- ka thënë babai i 12-vjecarit për “Fax News”.
