Para se Ariana Grande dhe ish-i dashuri i saj i ndjerë, Mac Miller, të lidheshin, ata ishin thjesht miq. Miqësia e tyre nisi nga një dashuri e përbashkët: muzika. Pavarësisht ndarjes pas 2 vit lidhjeje, dyshja ruante një marrëdhënie të mirë.
Miller u raportua se kishte ndërruar jetë pasditen e së premtes në shtëpinë e tij, pas një ataku kardiak të shkaktuar nga një mbidozë droge.
Çfarë duhet të dini për lidhjen e shkuar mes Grande dhe Miller:
Nisi si miqësi
Në shtator të 2016-s, Grande konfirmoi lidhjen e saj me Miller në mediat sociale, por para kësaj ata ishin dy miq të mirë. Reperi kontaktoi me Grande-n kur mendoi se ajo do të ishte një artiste që do t’i përshtatej këngës së tij “My Favorite Part”, pjesë e albumit të tij të katërt “The Divine Feminine”.
“E shkrova atë këngë dashurie para se ta takoja. Ishim thjesht miq të mirë në fillim. Realizuam atë këngën dhe vazhduam të qëndronim bashkë sërish. Në fillim kur regjistronim këngët ishim të rinj, por të shikoje atë sesi rritej dhe veten time, ishte e mrekullueshme”, ka thënë ai kohë më parë për “People”.
Kur dyshja performoi bashkë këngën “My Favorite Part” në skenë pati një moment romantik. Ariana Grande vendosi që ta puthte Mac Miller para se të largohej nga skena dhe ai bëri të njëjtën gjë.
“Ne kemi dalë për një kohë të gjatë dhe çdo gjë ndodhi në mënyrë kaq natyrale. Na pëlqen që të bëjmë muzikë bashkë. Por është shoqja ime më e ngushtë në botë”, është shprehur reperi.
Ata bashkëpunuan edhe për këngën e saj “The way”.
2 vite dashuri
Miller i qëndroi afër këngëtares pas sulmit që ndodhi në koncertin e saj në 22 maj të vitit të kaluar në Manchester. Nga sulmi terrorist vdiqën 22 fansa të këngëtares dhe u plagosën 119 të tjerë.
Më 4 qershor të 2017-s, Grande mbajti koncertin “One Love Manchester”, ku performoi dy këngë me Miller dhe ndanë një puthje në fund.
Pasi publikoi këngën e saj të parë që pas sulmit, “No Tears Left to Cry”, Mac shkoi në një postim në prill:
“Shumë krenar për këtë vajzën. Na mungoje”.
Ndarja
Në maj çifti konfirmoi ndarjen. Këngëtarja dhe reperi kishin vendosur që rrugët e tyre të ndaheshin, për shkak të axhendës shumë të zënë.
Grande foli hapur lidhur me marrëdhënien e saj me Miller, që e cilësoi si njeriun e saj të preferuar në planet.
“E respektoj dhe e adhuroj pafund dhe jam mirënjohëse që e kam në jetën time në çdo formë, pavarësisht sesi ndryshon marrëdhënia jonë. Dashuria pakushte nuk është egoiste”.
Hirushja e tij
Pavarësisht se u ndanë, një pjesë e marrëdhënies së tyre do të jetë e përjetësuar në muzikë. Grande zbuloi se kënga e tij “Cinderella”, ku flitet për momentet intime të çiftit në dhomën e gjumit, i është kushtuar asaj.
Ecën përpara
Pas ndarjes, Grande u lidh dhe u fejua me Pete Davidson, por mohoi që ta ketë tradhtuar ndonjëherë Miller. Reperi shpjegoi se të dy kanë ecur përpara pas ndarjes.
“Isha në dashuri me dikë. Ishim bashkë për dy vite. Kaluam bashkë kohë të mira dhe të këqija, strese dhe çdo gjë tjetër. Dhe më pas erdhi fundi dhe të dy ecëm përpara. Është kaq e thjeshtë”, tha ai.
