Qytetarët shqiptarë të cilët kanë lindur jashtë Shqipërisë tashmë do të kenë mundësi që t’i regjistrojnë fëmijët e tyre online, duke iu drejtuar Shërbimit Konsullor Online. Nuk është më e nevojshme të vini në Shqipëri për të regjistruar fëmijët tuaj, pasi këtë procedurë do të mund ta bëni direkt nga shtetet ku ju jetoni.
Nëpërmjet postimeve në rrjetet sociale, Ministria për Evropën dhe Punët e Jashtme shpjegon hapat se si duhet të veprojnë shqiptarët për të pasur sa më shumë lehtësira në procedurën e regjistrimit të fëmijëve të tyre.
“Fëmija juaj ka lindur jashtë Shqipërisë dhe duhet ta regjistroni? Mos humbisni kohë, ndiqni 3 hapat e procedurës për këtë regjistrim: Apliko online. Dërgo dokumentet në Konsullatën më të afërt. Konsulli bën verifikimin ligjor të dokumenteve. Regjistrimi është pa pagesë”, shkruhet në njoftimin e bërë nga MEPJ.
