Mbrëmja e së premtes ishte tragjike për familjarët e familjes Zyka, ku kushëriri i familjes qëlloi për vdekje 8 anëtarët e familjes. Familjarët rrëfejnë se gjetën shtatë kufoma në oborr e në shkallët e shtëpive dhe e teta në kuzhinë, pranë tavolinës së bukës. Aty ishte i ulur vogëlushi 8-vjeç, i cili po ushqehej në momentin që u qëllua me tre plumba nga 24-vjeçari Ritvan Zykaj.
Ledjoni është gjetur me duart e mbledhura pas kokës, i pajetë, i ulur në tavolinën e bukës dhe kishte plumba në këmbë, kokë dhe në krahë.
“Unë isha në gjumë kur ndodhi ngjarja. Kur u zgjova, nëna më tha se kishte dëgjuar të shtëna në fshat, por nuk e dinte se nga ku. Dola sepse e kisha lënë të takohesha në Selenicë me djalin e Azemit. As ai nuk ka qenë në shtëpi në kohën që ka ndodhur ngjarja. Kur shkova te vendi që e kishim lënë të takoheshim, nuk e gjeta. Më thanë që kishte shkuar në shtëpi. U nisa edhe unë për atje”, tregon i afërmi i familjes Zykaj.
Më pas tregon sesi është përballur me skenën e tmerrshme dhe se askush nuk kishte shenja jete. Të gjithë u gjetën të vdekur.
“Kur kam shkuar aty, ishte e tmerrshme. Të gjithë ishin të vrarë. Nuk kishte mbijetuar askush, përveç djalit tjetër të Demir Zykajt, Krenarit, 51 vjeç. Ai është shurdhmemec dhe nuk ka dëgjuar krismat. Ka qenë në gjumë brenda në shtëpi, por ka shpëtuar. Të tjerët ishin vrarë të gjithë. Edhe Sara, edhe Ledjoni i vogël. Ledjonin e ka vrarë duke ngrënë bukë. Ishte një masakër e vërtetë. Në atë kohë që ka ndodhur vrasja, disa sekonda më vonë unë kam dalë nga shtëpia. Fatmirësisht, nuk e kam ndeshur në rrugë. Unë nuk e njihja, sepse kam jetuar jashtë, pak kohë ka që jam kthyer”, shprehet kushëriri i familjes.
Burimi: Panorama
