Zakonisht pijet e ndryshme në lokale në këto ditë të nxehta të verës, por jo vetëm i shoqërojmë me akull. Mirëpo ndërkohë që pjesa jonë më e madhe kujdeset çdo ditë që të konsumojmë ujë të blerë dhe jo atë që vjen në rrjetin e shtëpisë sonë, rrezikojmë që mikrobet dhe infeksionet t’i marrim nga akulli.
Mjekët infeksionistë kanë vënë alarmin duke qenë se javët e fundit janë shtuar rastet me hepatiti A, një virus i cili përhapet më së shumti nga uji dhe dyshimet kryesore në këtë rast janë hedhur tek akulli që hedhim tek pijet.
I njëjti shqetësim në lidhje me prodhimin e pakontrolluar të akullit u ngrit edhe tre vite më parë, ku pas një hetimi të Institutit të Shëndetit Publik rezultoi se uji me të cilin ishte prodhuar akulli kishte shenja të “Steptokokut fekale”. Pikërisht kjo tregon se uji kishte ndotje nga ujërat e zeza ose ishte ujë i ndenjur në depozita.
Mjeku Pipero në një intervistë për “Klan plus” ka ngritur shqetësimin se në shumicën e rasteve sëmundjet infektive sidomos në verë vijën për shkak të ndotjes së ushqimeve dhe ujit. Vetëm javën e kaluar mësohet se 11 persona i janë drejtuar Spitalit Infektiv për shkak të helmimit nga konsumimi i sufllaqeve me mish në një “Fast-Food”, apo rasti më i fundit është në Elbasan ku 44 dasmorë u helmuan nga ushqimi.
Burimi: Panorama
