Policia po merr në kosideratë problemet shëndetësore si shkak për vetëvrasjen e 37-vjeçares Enkelejda Hallunaj, bashkëshortja e gjyqtarit të Krimeve të Rënda Dritan Hallunaj e cila u hodh dje nga kati i pestë i pallatit ku banon në Tiranë.
Viktima me profesion stomatologe, nënë e një vajze, punonte pranë Autoritetit Shëndetësor Rajonal. Ajo ka qenë tek prindërit e saj që jetojnë një kat poshtë apartamentit ku ndodhi ngjarja, kur ka dalë dhe ka shkuar në banesën e saj për të marrë disa ilaçe që duhej t’i konsumonte pas drekës.
Pikërisht në këtë kohë, kur ndodhej e vetme në apartamentin e saj në katin e pestë të pallatit rrugën “Nikolla Tupe” në Tiranë, 37-vjeçarja Enkelejda Hallunaj është hedhur nga lartësia duke gjetur vdekjen e menjëhershme në ora 13:15 të së enjtes.
Bazuar në këqyrjen e vendit të ngjarjes, hetuesit e policisë kanë përjashtuar paraprakisht rënien aksidentale duke ngritur pistën e vetëvrasjes për shkak të problemeve shëndetësore si versionin kryesor për vetëflijimin.
Pranë trupit të 37-vjeçares mësohet se janë gjetur edhe disa medikamente mjekësore që viktima konsumonte.
Ngjarja rezulton e papritur për të afërmit dhe kolegët e zonjës Hallunaj.
Të njëjtat burime shtuan se nga grupi i hetimit nuk është arritur të dokumentojnë ndonjë arsye tjetër për aktin e stomatologes përveç problemeve shëndetësore. Bashkëshorti i viktimës, gjyqtari Dritan Hallunaj i cili më 1 gusht u konfirmua në detyrë duke kaluar me sukses vetingun, ndodhej në Shkodër tek familjarë të tij bashkë me të bijën e mitur, në momentin kur ka ndodhur ngjarja.
Burimi: Ora News
