Pak javë më parë mbarë opinioni shqiptar u trondit nga vrasja në Shkodër e ish-efektivit të policisë Boran Bërçana dhe partneres së tij Silvana Ndoçi. Çifti u ekzekutua duke u qëlluar me armë sapo ata kishin mbërritur para banesës së tyre ku prej kohësh jetonin me qera.
Ndërkohë që ende vazhdojnë hetimet për zbardhjen e plotë të ngjarjes, drejtori i policisë së Shkodrës i pyetur nga “Panorama” në lidhje me këtë çështje ka treguar se po punohet në disa pista hetimi në bashkëpunim me prokurorinë për të arritur zbardhjen e plotë të kësaj vrasje të dyfishtë.
Ndërkohë në dritë kanë dalë edhe detaje të reja në lidhje me këtë ngjarje tronditëse, të cilat mund të shërbejnë për të hedhur edhe më shumë dritë rreth vrasjes dhe autorit të mundshëm që ekzekutoi ish-efektivin e policisë, Bora Bërçanën dhe Silvana Ndocin.
Burime pranë Prokurorisë së Shkodrës kanë treguar për “Panoramën” se ka dyshime të forta se Boran Bërçana dhe autori i mundshëm kanë pasur një njohje me njëri-tjetrin. Madje thuhet se vetëm pak sekonda para se ta vrisnin Borana e ka përshëndetur ekzekutorin.
Burime pranë organit të akuzës tregojnë se në momentin kur ish-efektivi i policisë po zbriste nga makina e tij për të shkuar tek pallati ku banonte, pak metra para se të mbërrinte në destinacion mund të jetë përshëndetur me autorin e krimit.
Pikërisht ky detaj na bënë të besojmë se viktima dhe autori i krimit kanë pasur një njohje mes tyre. Pas përshëndetjes dyshohet se ekzekutori ka qëlluar me 28 plumba ndaj Boranës dhe partneres së tij, të cilën mendohet se ai e ka vrarë pasi ajo i ka parë fytyrën dhe e ka identifikuar se kush është. Në mënyrë për të mos lënë pas dëshmitar ai e ka qëlluar për vdekje edhe 24-vjeçaren.
Pas krimit ai u largua duke shkuar në zonën e By Passit, ku braktisi ehe makinën që rezultoi e vjedhur në Kosovë. Ai u sigurua që ta digjte makinën dhe armën e krimit për të humbur çdo gjurmë të mundshme.
Burimi: Panorama
