Këngëtarja Demi Lovato është në gjendje të qëndrueshme pasi u shtrua me urgjencë në spitalin e Los Anxhelos. Ajo u gjet e pavetëdijshme nga mbidoza në shtëpinë e saj në Hollywood Hills.
“TMZ” njoftoi se këngëtarja u transportua në një institucion mjekësor të fshehtë pak para mesditës të martën, pasi miqtë telefonuan 911.
Një burim konfirmoi se asaj i ishte dhënë Narcan kur u gjet e pavetëdijshme, një ilaç që përdoret për të sjellë në vete pacientin pas mbidozës.
Megjithatë këngëtarja kishte refuzuar të zbulonte ilaçet që kishte marrë ndërsa në shtëpi nuk u gjet asgjë e dyshimtë. Ajo ka refuzuar të tregojë nëse kishte marrë heroinë dhe nuk zbulonte detaje të mëtejshme.
Demi Lovato ka luftuar më parë me varësinë ndaj kokainës dhe drogërave të tjera. Sipas “Usweekly”, një nga miqtë e këngëtares mbante Narcan me vete ‘në rast se diçka e tillë do të ndodhte’.
Aktualisht nuk ka hetim penal sepse nuk mund të përcaktohet se çfarë droge kishte përdorur Lovato.
Përfaqësuesi i këngëtares tha në një deklaratë për “Variety” se: “Demi është zgjuar dhe është me familjen e saj, e cila shpreh falënderime për të gjithë për dashurinë, lutjet dhe mbështetjen”.
“Disa nga informacionet që raportohen janë të pasakta dhe kërkojmë respekt për privatësinë dhe jo spekulime, pasi shëndeti dhe shërimi i saj është gjëja më e rëndësishme tani”.
Koncerti i së enjtes i këngëtares në Atlantic City, New Jersey, është anuluar.
Demi Lovato ka luftuar prej kohësh me varësinë ndaj drogërave. Pas 6 vitesh rehabilitim, këngëtarja u ishte rikthyer drogërave dhe alkoolit, gjë të cilën ajo e pranoi me publikimin e këngës “Sober” vetëm një muaj më parë.
