Prej dy ditësh Atika është përfshirë nga zjarret ndërsa mbi 50 njerëz kanë humbur jetën dhe qindra të tjerë janë plagosur.
“Shqiptarja.com” raporton se mes të plagosurve tyre janë edhe 13 shqiptarë, ndërsa njëri dyshohet se ka humbur jetën.
Mondi Sinaj, emigrant në Greqi, në një lidhje telefonike për “Report Tv” nga Athina shprehet se në zonën që ka rënë zjarri kishte shumë shqiptarë që punonin në banesat që janë djegur, ndërsa nga informacionet e para janë 13 të lënduar.
Përsa i përket shqiptarit që dyshohet se ka humbur jetën, ai është nga Tepelena dhe sipas Sinajt, nuk arriti që të dalë nga makina, pas zjarrit.
“Në fakt në zonën e zjarreve ka pasur shumë shqiptarë të cilët punojnë nëpër shtëpitë e grekëve. Kemi informacion se 13 shqiptarë janë lënduar nga flakët. Kam folur me shumë prej tyre. Deri nga darka besoj se do të kemi informacion të plotë. Flitet edhe për një djalë nga Tepelena që dyshohet se është djegur në makinën e tij, por nuk e dimë 100% të saktë.
Kemi pasur shumë ndihmë nga ambasada. Janë interesuar deri vonë në orët e mbrëmjes. Zjarret kanë rënë kudo në Athinë në të gjitha anët. Kam parë gra dhe fëmijë që vuajnë dhe digjen është diçka që nuk përshkruhet me fjalë, kam parë masakër me sy.
Ato që hoqëm dje nuk mund të përshkruhen dot. Njerëzit u hodhën në det për të shpëtuar. Është diçka e tmerrshme. Unë isha në shtëpi dhe u interesova për njerëzit që njihja. Zjarri ishte me shpejtësi për shkak të erës”.
Një tjetër emigrante shqiptare nga Athina, Drita Bushi në një lidhje telefonike për “Report Tv” thotë se janë djegur 10 banesa të shqiptarëve, ndërsa situata është mjaft e rëndë.
“700 banesa janë djegur, shumë njerëz humbën jetën, pashë një fëmijë dy muajsh, që humbi jetën nga zjarri. 10 banesa të shqiptarëve janë djegur nga zjarri. Një familje shqiptare erdhi më kërkoi ndihmë dhe më tha u dogj cdo gjë. Ajo tha u futëm në det dhe erdhën anijet na morën. Një burrë më tha po rrija në ballkon, u hodha në det për të shpëtuar. Në një party u dogjën 25 persona. Shqiptarë nuk e dimë akoma a ka të vdekur, nuk e kemi marrë vesh akoma. Skenat janë si në filma. Situata nuk është aspak e mirë, po gjenden shumë njerëz të vdekur. Thonë që janë 50 të vdekur, por numri është më i lartë”.
Burimi: Shqiptarja.com
