Në orët e para të mëngjesit të së dielës, ish-polici Boran Bërçama dhe bashkëjetuesja e tij Silvi Ndoci, u qëlluan për vdekje me breshëri plumbash në makinë pranë banesës së tyre në Shkodër.
Fatmirësisht, plumbat nuk prekën dot fëmijën dy-vjeçar të çiftit, i cili po qëndronte në sedilen e pasme të makinës.
“Top Channel” shkruan se hetimet janë fokusuar në pistën e vrasjes për shkak të së kaluarës së tij në radhët e Policisë së Shtetit, ku kishte shërbyer për disa vite si agjent krimesh, por edhe me strukturat e rendit.
30-vjeçari ishte një efektiv me të kaluar problematike, mbi të cilin ishin nisur disa ecuri për masa disiplinore.
Dyshohet se ish-polici i ndjerë, bashkëpunonte me grupe të rrezikshme kriminale në qytetin verior, si gjatë kohës në detyrë por edhe pas largimit me dëshirë nga detyra.
Sakaq, janë kryer hetime dhe verifikime në terren dhe janë marrë në pyetje personat që mund të kenë dijeni për ngjarjen.
Deri më tani, policia ka dijeni se kanë qënë dy autorë, të cilët dogjën dhe makinën me të cilën u larguan, duke humbur çdo gjurmë të mundshme.
