Një ngjarje e rëndë tronditi 17 ditë më parë mbarë botën. 12 futbollistë të vegjël dhe trajneri i tyre u bllokuan nga përmbytjet në një shpellë në Tham Luang në Tajlandë.
Prej disa ditësh ekipet e shpëtimit kanë punuar për të nxjerrin futbollistët e vegjël nga shpella. Ditën e diel u shpëtuan tetë prej djemve, të cilët u shtruan në spital pasi ishin në gjendje jo të mirë shëndetësore.
Ndërsa 4 djemtë e tjerë, dhe trajneri kishin ngelur të bllokuar prej 17 ditësh në shpellë dhe vetëm ditën e sotme u arrit që të finalizohet procesi i shpëtimit të tyre.
Të gjithë tashmë janë duke pritur që të dalin katër zhytësit e shpëtimit dhe mjeku për të festuar shpëtimin e futbollistëve të vegjël.
Pak ditë më parë FIFA shprehu keqardhjen për ngjarjen e ndodhur dhe i ftoi fëmijët në finalen e Botërorit Rusi 2018. Mirëpo duke parë gjendjen e tyre shëndetësore 12 djemtë nuk mund të shkojnë në Rusi më 15 korrik, pasi duhet të qëndrojnë në spital. Ata duhet të mbahen nën vëzhgim për të shmangur çdo rrezik pas qëndrimit për 17 ditë në shpellë.
Burimi: BBC
