Dy futbollistët shqiptarë që luajnë me Kombëtaren e Zvicrës i bënë krenarë gjithë shqiptarët pasi i festuan dy golat e shënuar kundër Kombëtares së Serbisë me simbolin e shqiponjës me duar. Një veprim ky që u brohorit nga shqiptarët, por që dy futbollistëve iu hapi probleme.
Pasi FIFA i dënoi me 10 mijë franga zvicerane secilin prej tyre, duket se edhe ekipi i Zvicrës ka filluar të mendojë të vendosë një masë ndëshkuese ndaj futbollistëve që mbajnë shtetësi të dyfishtë.
Sekretari i Përgjithshëm i Federatës Zviceriane, Alex Miescher është shprehur se do të përjashtohen nga kombëtarja lojtarët me shtetësi të dyfishtë, nisur kjo edhe nga festimet e dy futbollistëve shqiptarë.
“Ky incident tregon se ka një problem. Duhet të pyesim veten, a duam shtetas të dyfishtë”, ka thënë Alex.
Kjo deklaratë ka irrituar futbollistin shqiptar, Granit Xhakën i cili ka shpërthyer kundër autoriteteve përkatëse.
“Miescher i ka zhgënjyer lojtarët aktualë dhe ata që do të vijnë. Pas simbolit të shqiponjës, na siguroi mua dhe Shaqirin se do na mbronte, por ja çfarë ndodhi. Kuptoj nga fjalët e tij se nuk beson te futbollistët me dy shtetësi, por ne japim gjithçka për këtë fanellë. Rrënjët e mia janë në Kosovë, ashtu siç janë për Embolo’ në Kamerun, për Akanxhi në Nigeri, apo Rodrigez në Kili dhe Spanjë. Madje, edhe trajneri Petkoviç ka dy shtetësi. Me këto komente, sekretari i federatës na ka zhgënjyer dhe na ka kthyer në Epokën e Gurit”, është shprehur Xhaka.
