Tërmeti që tronditi mesditën e sotme Tiranën dhe zonat përreth, ka shkaktuar disa probleme në Operatorin e Sistemit të Transmetimit të Shpërndarjes, si pasojë e lëkundjes tektonike. Mësohet se rreth orës 11.03 (orë në të cilën ndodhi edhe tërmeti), është lajmëruar për dëmtime të shkarkuesit në zbarrat 110 kV të N/stacionit Lac 2.
Ndërkohë që dëmtime pati edhe në linjat elektrike në Shkopet – Rubik, Ulëz – Lac 2 dhe Bushat i ri – Lezhë, duke shkaktuar ndërprerjen e energjisë elektrike.
Si rezultat i veprimeve operative për kthimin e skemës u stakua për disa minuta energjia elektrike. Brenda orës 12 të ditës së sotme u rilidh energjia elektrike në të gjitha nstacionet e prekura nga defekti: Fushë- Arrëz, Kalimash, Kalimash Tunel, Kukës, Tuc, Pukë, Krumë, Lac 2, Fushë-Kuqe, Rrilë, shkruan gazeta “Panorama”.
