Katër mijë infermierëve që janë diplomuar në vitet 2002-2006 u është ulur paga me rreth 5000 lekë.
Shkak për këtë është bërë diploma e tyre, pasi sistemi i shkollimit 4-vjeçar (3 vite e gjysmë teori dhe 6 muaj praktikë) është i barazvlefshëm me diplomën “Bachelor” të “Sistemit Bolonjës” dhe jo me nivelin Master siç u njihej deri tani.
Ky brez të diplomuarish që përfshin ndryshimin e sistemit i vjetër në atë të kartës së Bolonjës, do të vuajë jo vetëm uljen e pagës por rezulton edhe debitur ndaj shtetit. Infermierët po firmosin peticion, ndërsa Ministria e Arsimit ka ngritur tashmë një grup pune për të zgjidhur situatën.
Kryetari i Shoqatës së Infermierëve, Elson Jaçaj, tha për “OraNews” se do t’i drejtohen gjykatës për këtë çështje, ndërsa infermierët po firmosin peticion ndaj Ministrisë së Arsimit.
“Janë njoftuar që diploma e tyre, sistemi katër vjeçar nuk njihet më por do të njihet si diplomë bachelor dhe automatikisht paga e tyre do të jetë më e ulët. Përpos kësaj është kërkuar që çdo pagesë e bërë nga viti 2015 dhe deri më sot do t’i kthehet mbrapsht Ministrisë së Arsimit për njohjen e kësaj diplome. Sipas tyre janë debitorë ndaj shtetit. Ndaj kërkohet ose të kthehen paratë mbrapsht, ose të bëhet Masteri që kushton mbi 2 milionë lekë”.
Jaçaj u shpreh se çështja mund të shkojë deri në gjykatë. Ministria e Arsimit ka ngritur një grup pune për të bërë verifikimet përkatëse për këtë problem të krijuar në pagat e infermierëve, ndërsa në reagimin për mediat thotë se së bashku me Universitetin e Mjekësisë jemi në diskutime për t’i dhënë një zgjidhje definitive kësaj çështje sensitive për rreth 4 mijë infermierë, që do të jetë në favor të bluzave të bardha.
